Aze unos anyos ke no prefero ver los fragmanes de los filmos antes de ir al sinema. Penso ke ay munchas emportantes shenas del filmo ke mostran en este chiko pedaso. Esto es lo mismo para los livros. Eskojo mi livro sin demandar a dinguno su opinion, ni meldo los kritikos. Puede ser ke no es enteresante para el o eya, pero lo es para mi.
Aze unos mezes ke keriya meldar el livro “Segera”. Pero no konosia dayinda el eskritor. Puede ser ke fue la kacha amariya ke me tiro la atensiyon o oyi de uno, no se. Merki el livro, “Segera” komo unos de mis livros para este enverano. Ansi fue mi renkontro kon los livros de Jose Saramago, un eskritor portugez muy famoso.
El livro konta una utopya. Un diya normal, ay muncho trafiko. Un senyor, en su otomobil, se keda en la luz kolorada. Ma no puede kondusir mas su koche kuando el luz se aze vedre. Empesa a gritar “no puedo ver mas, esto siego!” Es una seguera no preta ma blanka ke enfekta todos los ke tienen una relasyon kon el; su mujer, el doktor de ojos, la persona ke le ayudo en la kaye… Es muy paresida a lo ke mozotros sufriyimos kon el Korona.
El governo desida de meter los siegos en un parte de un edifisyo i los ke tuvieron kontakto ma no son siegos en una otra parte del mizmo edifisiyo. En una semana, toda la sivdad ya esta siega ma solo una persona no fue afektada; la mujer del doktor de ojos. Eya es la unika ke resiste a este epidemiya. No save porke eya es diferente ma ayuda a los demas. Mozotros vemos la realidad kon sus ojos. Kuando dingunos pueden ver no hay mas leyes ni orden. Es el retorno al los tiempos primitivos. Los ke tienen fuersa la utilizan asta el final. La blanka segera es la istorya ke mos eksplika komo un publiko puede pedrer todo sus valores morales i se transforma en un ser egoista. Saramago gano el premiyo Nobel de literatura kon este ovra. La segera es una metafora para eksplikar muestra sosiedad ke normalmente "mira" ma en realidad no "ve".
Komo me plazyo muncho este romanso, merki “Ver” del mizmo eskritor. Pensi ke puede tener una relasyon kon Segera. Teniya razon. La primera parte eksplika una koza rara ke no se puede realizar fasilmente. En una kapital ay eleksiyones lokales. Ma kuando avren las anvelopes, ven ke 75% de los votos estan vazios. El governo se ansyeya i repeta los eleksiyones. Esta vez es 83%. La djente kere eksplikar una koza muy serioza, ke kere un trokamiento total del sistema. Ma el governo lo ve komo un atako a su orden. Diziendo ke esto es kontra la demokrasiya, serra toda la sivdad deshando solo el itfaye i el ospital. El governo dize ke los ke votaron vazio son teroristas, anarshistas. El governo kreye ke sin la polisia, sin su kontrol, la djente en la kapital no puede kontinuar a bivir normalmente. Ma en realidad no es asi. Desilusiyonado, el governo aze disturbios en la sivdad. La segunda parte del livro avla de la segera ke paso kuatro anyos antes i vemos muestros karakteres del primer livro ke biven el la mizma sivdad. No vos va dizir el final. Este livro mos eksplika komo los governos utilizan sus fuersas politikas para azer mal, i la frajilidad de la demokrasiya.
Los livros de Saramago fueron una muy buena eleksiyon. El utiliza fantasia para azer la realidad del mundo mas soportavle. No utiliza ni nombres para los payizes, ni para las sivdades, ni para los karakteres. Diziendo ke estas kozas son universales ke pueden pasar en todos lados. Es un kritisizmo de muestra epoka. Mi proksimo livro del mismo eskritor sera “Kabil”.
Karel Valansi, Şalom, 7 Ekim 2020 https://www.salom.com.tr/haber-116090-mirar_ma_no_ver_.html
Yorumlar